The Guardian segir að rannsóknin sé afleiðing af árásum Ron DeSantis, ríkisstjóra, á menntakerfið en gripið hefur verið til ritskoðunar á kennslubókum í ríkinu og strangar reglur hafa verið settar um heimild kennara til að ræða um kynlíf, kynhneigð og kynþáttamál við nemendur sína.
DeSantis stefnir á að taka slaginn við Donald Trump um að verða forsetaframbjóðandi Repúblikanaflokksins á næsta ári. Hann hefur að undanförnu gengið hart fram, bæði í orði og verki, gegn hinni svokölluðu Wokestefnu.
Carl Zee skýrði frá máli kennarans í tísti á Twitter þann 11. maí og sagði að starfshættir hennar séu nú til rannsóknar vegna þess að hún hafi sýnt nemendum sínum Strange World í kennslustund. Einn nemandinn hafi síðan skýrt foreldrum sínum frá því. „Flórída er ekki öruggt ríki fyrir kennara. EKKI FLYTJA HINGAÐ!“ skrifaði hann einnig.
Myndin fjallar um könnuði sem reyna að bjarga dularfullu landi frá því að missa mikilvæga orkulind. Ein af aðalpersónunum er samkynhneigð en það er harla óvenjulegt í teiknimyndum fyrir börn.
Hann birti mynd af bréfi frá menntamálaráðuneyti Flórída þar sem fram kemur að í kjölfar kvörtunar sé verið að rannsaka hvort kennarinn hafi gerst sek um ósæmilegt athæfi. Ekki kemur fram í bréfinu hvaða ásakanir er verið að rannsaka.
