Danskur karlmaður er grunaður um að hafa myrt eiginkonu sína á heimili þeirra í Suður-Frakklandi. Kunningjar hjónanna fundu mikinn óþef leggja frá frystiskáp þeirra og þegar þau opnuðu hann sáu þeir lík konunnar.
Þetta fullyrða saksóknarar að sögn AFP fréttastofunnar. TV2 í Danmörku greinir frá málinu.
Maðurinn var handtekinn snemma á sunnudag eftir að lögregla hafði vaktað heimili þeirra við Mandelieu-la-Napoule sem er skammt frá Cannes.
Bað þá að fara með frystinn í urðun
Tveir kunningjar þeirra munu hafa gert lögreglu viðvart eftir að maðurinn hafði beðið þá að flytja frystiskápinn á urðunarstað.
Maðurinn sem grunaður er um morðið sagði kunningjum sínum að hann hafi drepið hund sem væri í frystinum en þegar þeir opnuðu hann sáu þeir ekki aðeins dauðan hvolp heldur einnig lík eiginkonu hans.
Krufning leiddi í ljós að konan hafði verið skotin.
Hlaðnar byssur, kókaín og hass
Að sögn ákæruvaldsins hafa ekki formlega verið borin kennsl á fórnarlambið en krufning bendir til þess að hún sé eiginkona hins grunaða. Þá leggur ákæruvaldið áherslu á að rannsókn sé enn í gangi.
Við yfirheyrslur hefur maðurinn ekki gefið neinar skýringar á því af hverju líkið var í frystiskápnum.
Lögreglan hefur fundið nokkur hlaðin vopn á heimilinu, kókaín og hass.
Þá segir lögreglan að við geðrannsókn hafi ekkert komið fram sem bendi til þess að maðurinn sé ósakhæfur.