Vegna kalds veðurfars og áhrifa heimsfaraldurs kórónuveirunnar hafa miklar truflanir orðið á dreifingu eggja í Ástralíu. Svo hart kveður að þessu að sumar stórverslanir eru byrjaðar að skammta egg og miða við tvo bakka á hvern viðskiptavin.

Það gæti því orðið erfitt fyrir marga að fá sér egg og beikon, nú eða baka.

The Guardian segir að einnig hafi dregið úr framleiðslu á mörgum hænsnabúum og það eigi einnig þátt í að lítið framboð sé af eggjum.

Talsmaður samtaka ástralskra eggjaframleiðenda sagði að almennt sé næg eggjaframleiðsla í landinu til að mæta eftirspurn, vandinn í aðfangakeðjunni sé að 2018 hafi lög tekið gildi sem kveða á um að varphænur, sem ekki eru í búrum, verði að geta gengið um utanhúss í að minnsta kosti átta klukkustundir á dag. Þetta veldur vanda á veturna vegna kulda og skemmri tíma sem dagsbirtu nýtur við.

Búregg eru nú um 40% af eggjasölunni í landinu en 50% koma frá hænum sem ganga lausar.