Myndband af árás á rússneskan hermann þar sem hann er að sinna viðkvæmum erindagjörðum hefur vakið nokkra athygli á samfélagsmiðlum. Myndbandið, sem horfa má á í spilaranum hér fyrir neðan, sýnir loftmynd af því þar sem rússneskur hermaður situr á hækjum sér og sinnir kalli náttúrunnar. Skyndilega fellur handsprengja af himnum ofan stutt frá hermanninum og springur með miklum hvelli.
Krafturinn af sprengingunni feykir hermanninum um koll og um stund liggur hann hreyfingarlaus á jörðinni. Svo er eins og hann nái áttum og hefst þá handa við að hysja upp um sig buxurnar og virðist blessunarlega ekki hafa sloppið frá hildarleiknum.
Myndbandið gefur glögga mynd af bardagaaðferðum í nútímahernaði en árásin var gerð af litlum dróna sem stýrt er af liðsmönnum úkraínska hersins. Leitað er eftir skotmörkum úr lofti og síðan er handsprengjum sleppt úr drónanum og þess freistað að fella rússneska hermenn eða valda tjóni á tólum og tækjum rússneska innrásarhersins.