Expressen skýrir frá þessu. Fram kemur að þegar lögreglan kom á vettvang hafi fjölskylda hennar sagt að hún hefði tekið eigið líf. En skömmu síðar handtók lögreglan móður stúlkunnar, bróðir hennar og frænku hennar. Þau eru öll grunuð um morð. Ekki er langt síðan móðirin kom til Svíþjóðar með börnin sín.
Ástæðan fyrir handtökunum var að frásagnir fólksins gengu ekki upp að mati lögreglunnar. Telur hún að fjölskyldan hafi sviðsett sjálfsvíg til að leyna því að stúlkan var myrt. Meðal þeirra upplýsinga sem lögreglan hefur aflað við rannsókn málsins er að morðið hafi verið „heiðurstengt“. Stúlkan er sögð hafa verið með vinum sínum að loknum skóladegi nýlega og það fór að sögn ekki vel í fjölskyldu hennar. Þau viðbrögð komu skólayfirvöldum ekki á óvart því þau höfðu upplifað svipuð viðbrögð áður. Í skóla stúlkurnar hafði starfsfólkið því miklar áhyggjur þegar hún mætti ekki á fimmtudaginn en fjölskyldan hennar tilkynnti hana veika. Hún fannst látin um kvöldið.
Hin handteknu hafa komið með mismunandi skýringar á atburðarásinni og einnig földu þau ýmsa muni eftir lát stúlkunnar. Þetta eru að sögn hinna handteknu munir sem þau segja að stúlkan hafi notað við sjálfsvígið og farsími hennar.
Það hefur styrkt grun lögreglunnar, um að um morð hafi verið að ræða, að niðurstöður krufningar leiddu í ljós að áverkarnir á stúlkunni pössuðu ekki við þá sögu sem fjölskylda hennar sagði um meint sjálfsvíg hennar.
