Yfirleitt er kaffikorgi hent í ruslið þegar búið er að hella upp á. En það er eiginlega bara sóun að henda honum því hann er til margra hluta nytsamlegur.

Það er hægt að nota hann í eitt og annað, bæði utanhúss og innanhúss.

Það er til dæmis hægt að búa til sápu úr honum með því að taka nokkrar lófafyllir af kaffikorg og blanda smá olíu saman við eða þar til þér finnst þetta vera orðið jafnt og vel klístrað. Í baðinu finnur þú síðan hvernig húðin verður silkimjúk af þessari blöndu.

Það er mjög gott að nota kaffikorg ef þú færð olíu á hendurnar. Þvoðu þær með vatni og kaffikorgi, olían hverfur og hendurnar verða mjúkar. Það er líka hægt að nota kaffikorg til að fjarlægja lykt af höndum, til dæmis eftir meðhöndlun á fiski eða hvítlauk.

Kaffikorgur er fyrirtaks áburður og því um að gera að setja hann á blómin eða trén í garðinum.

Það er hægt að nota hann til að þrífa eldhúsvaskinn og það er líka gott að setja hann í niðurfallið, hann losar um það sem safnast fyrir þar.

Ef þú glímir við mikla táfýlu í skónum þínum þá er hægt að setja kaffikorg í sokk og setja hann ofan í skóinn yfir nótt. Næsta morgun ætti óþefurinn að mestu að vera horfin.

Ef þú glímir við óþef í ísskápnum er hægt að losna við hann með því að segja smávegis af kaffikorg, um það bil eina matskeið, í ísskápinn. Hann dregur óþefinn í sig.

Kaffikorgur er góður við þrif á pottum og pönnum. Notaðu kaffikorg, smá vatn og svamp til að skrúbba potta og pönnur og árangurinn kemur á óvart. Það er líka hægt að nota þessa aðferð við að þrífa grillið.