Þann 2. október á síðasta ári fannst fótleggur af manni í rusli í sorpbrennslustöð á Grænlandi. Svæðinu var strax lokað og lögreglan hófst handa við að fara í gegnum allt ruslið í stöðinni. Nokkrum dögum síðar fannst mannshöfuð.

Fórnarlambið reyndist vera Maassannguaq Dalager, 28 ára.

Tæpri viku eftir að fótleggurinn fannst handtók lögreglan þrjá einstaklinga vegna rannsóknar málsins. Tveimur var fljótlega sleppt en einn var úrskurðaður í gæsluvarðhald. Hann heitir Tittus Hansen og er 28 ára.

KNR segir að í gær hafi hann verið dæmdur til ótímabundinnar vistunar í fangelsi. Það þýðir að dómstóllinn telur hann svo hættulegan umhverfi sínu að hann verður vistaður í fangelsi um óákveðinn tíma.

Hansen neitaði sök þar til í gær en þá játaði hann loks að hafa myrt Dalager og hlutað lík hans í sundur.

Játningin kom eftir að hljóðupptaka var leikin fyrir dómi en á henni heyrist Hansen lýsa morðinu og því sem á eftir fylgdi í smáatriðum fyrir tveimur mönnum.

Dómarinn sagði við dómsuppkvaðninguna að engin vafi leiki á að Hansen hafi myrt Dalager og síðan hlutað líkið í sundur. Þetta hafi verið hrottalegt og villimannslegt.

Hansen unir dómnum.