Enn er of snemmt að spá fyrir um hvort hröð og mikil útbreiðsla Ómíkronafbrigðis kórónuveirunnar muni gera að verkum að heimsfaraldurinn hættir að vera heimsfaraldur og fer yfir á viðráðanlegra stig sem landlægur sjúkdómur. „En ég vona að svo sé,“ sagði Anthony Fauci, helsti farsóttafræðingur Bandaríkjanna, á mánudaginn.

CNN segir að Fauci hafi látið þessi orð falla á fjarfundi á vegum World Economic Forum.

 Ef faraldurinn fer yfir í að vera landlægur þýðir það að hann er alltaf til staðar á ákveðnum svæðum en hefur ekki áhrif á mjög marga hverju sinni og truflar ekki samfélagsstarfsemina eins og gerist þegar um heimsfaraldur eða mjög útbreidda farsótt er að ræða.

Fauci sagði jafnframt að við séum heppin að Ómíkron sé ekki með sum af einkennum Deltaafbrigðisins og að flestir þeir sem smitast af afbrigðinu komist klakklaust í gegnum sýkinguna.

Hann sagði að það sé enn óljóst hvort Ómíkron verði hin lífræna bólusetning gegn veirunni, eins og allir vona, því það sé svo mikil fjölbreytni í nýjum afbrigðum veirunnar. Þar með er hann að segja að við getum ekki enn hrósað heppni yfir því að faraldrinum sé lokið því enn geti ný og alvarleg afbrigði af veirunni komið fram.