Þýskur dómstóll í borginni Koblenz dæmdi í dag fyrrum sýrlenska ofursta í lífstíðarfangelsi fyrir glæpi gegn mannkyninu. Dómur er talinn marka vatnaskil enda um að ræða fyrstu réttarhöldin gegn kerfisbundnum ofbeldisverkum Sýrlandsstjórnar.
Anwar Raslan, 58 ára, var fundinn sekur um að bera ábyrgð á 27 morðum í Al-Khatib fangabúðunum í Damascus, höfuðborg Sýrlands, árin 2011 og 2012. Saksóknarar sökuðu hann um að hafa fyrirskipað nauðganir og kynferðislegt ofbeldi á hendur föngum í búðunum auk þess sem einstaklingar voru pyntaðir með raflosti, slegnir með vírum og margskonar tólum auk sem fangar voru kerfisbundið sviptir svefni. Þá greindu vitni einnig frá því að fangar hafi verið brenndir með sígarettum og beitir margskonar öðru ofbeldi í búðunum.
Fyrir rétti var Raslan sakaður um að bera ábyrgð á 58 morðum auk þess að hafa fyrirskipað pyntingar á 4.000 einstaklingum en ekki var hægt að sanna allar þær ásakanir.
Meira en 80 vitni, þar á meðal 12 einstaklingar sem flúðu ógnarstjórnina í Sýrlandi og eru nú búsettir víða um Evrópu, voru kölluð til við réttarhöldin og sögðu sögu sína í vitnastúkunni.
Raslan kaus að tjá sig ekki á meðan réttarhöldunum stóð en í yfirlýsingu frá lögfræðingi hans kom fram að hann vísaði því alfarið á bug að hafa beitt nokkurn mann ofbeldi eða pyntingum né hafi hann hagað sér ómannúðlega. Þá kom fram að Raslan hafi sjálfur flúið Sýrland árið 2015 og leitað verndar hjá lögreglunni í Berlín árið 2015. Hann hafi aldrei dregið dul á fortíð sína sem yfirmaður fangabúðanna í Damascus.
Fyrir utan réttarsalinn mættu sýrlenskir flóttamenn sem héldu meðal annars á borðum og skiltum þar sem vakin var athygli á því að ekki er vitað um afdrif fjölmargra Sýrlendinga sem voru andvígir ríkjandi stjórn landsins undir forystu Bashar al-Assad forseta.
