Á meðan Japanir og heimsbyggðin öll eru miður sín yfir morðinu á Shinzo Abe, fyrrverandi forsætisráðherra Japans, þá eru aðrir sem taka tíðindunum með öðrum hætti. Þjóðernissinnar í Kína og Suður-Kóreu hafa fagnað fráfalli stjórnmálamannsins mjög enda var Abe fyrirlitinn af þessum hópum.
Í umfjöllun News.com kemur fram að á kínverska samfélagsmiðlinum Weibo hefur lítill hluti fólks fagnað morðingja Abe sem hetju og að lýst því yfir að nú væri rétti tíminn til að blása til fagnaðar.
Abe var forsætisráðherra Japans í átta ár en hann steig til hliðar útaf heilsufars áhyggum árið 2020. Hann stóð fyrir ýmsum umbótum í japönsku samfélagi en þá ekki síst í utanríkismálum þar sem hann reyndist Kína óþægilegur ljár í þúfu. Með hann við stjórnvölinn stóðu Japanir upp í hárinu á Kínverjum og ýttu meðal annars Quad-samstarfinu að stað sem var einskonar varnarbandaleg með Bandaríkjamönnum, Áströlum og Indlandi – eitthvað sem Kínverjar líta á sem „hið asíska NATÓ“. Þá reitti Abe Kínverja einnig til reiði með því að stórauka fjármagn sem rann til hernaðar- og varnarmála í Japan.
Margir þjóðernissinnar í Kína eru enn reiðir Japönum fyrir að ráðast inn í Kína í aðdraganda seinni heimsstyrjaldarinnar árið 1937. Á samfélagsmiðlinum Weibo mátti sjá færslur þar sem sagt var að við hæfi að Abe hafi fallið í valinn einum degi eftir að 85 ár voru liðin frá árásinni.
Árið 2013 heimsótti Abe Yasukuni-hofið í Tókýó til að votta virðingu og biðja fyrir sálum allra þeirra sem börðust og féllu fyrir Japan. Þar hvíla meðal annars hermenn sem börðust í seinni heimsstyrjöldinni og Kínverjar líta á sem stríðsglæpamenn. Heimsóknin vakti mikla reiði meðal stjórnvalda í Kína, ekki síst harðra þjóðernissina. Gaf Abe út yfirlýsingu sama dag um að tilgangurinn hafi alls ekki verið að að votta stríðsglæpamönnum virðingu né bera lof á hernaðarhyggju. Var bent á að tilgangurinn var meðal annars sá að endurnýja heiti um að Japan skuli aldrei aftur heyja stríð
En þrátt fyrir afsökunarbeiðnina hafa margir í Kína haft horn í síðu Abe.
Stjórnvöld í Kína deila þó ekki opinerlega þessu hatri á Abe. Utanríkisráðuneyti Kína lýsti því yfir að Kínverjar væru í áfalli strax eftir árásina. Sendiráð Kínverja í Tókíó sendi fjölskyldu forsætisráðherrans fyrrverandi samúðarkveðjur og sagði Abe hafa átt þátt í að þróa samskipti Japan og Kína frekar á meðan hann sat í embætti forsætisráðherra.
