Myndin, sem heitir „Neue Spuren im Fall Maddie“ var sýnd á mánudaginn en í henni koma fram nýjar upplýsingar um málið. Sky News skýrir frá þessu.
Fram kemur að Christian B hafi sent bréf til þáttagerðarkonunnar Jetta Rabe. Hann afplánar nú dóm fyrir nauðgun á konu á áttræðisaldri í Algarve árið 2007, sama ár og Madeleine hvarf en hún var þá tæplega fjögurra ára. Í bréfunum segir Christian B að ásakanir um að hann hafi átt hlut að máli séu „fáránlegar“.
Í bréfunum segist hann einnig hafa stundað sölu á fíkniefnum og hafi gengið vel því hann hafi farið varlega. „Lögreglan náði mér aldrei því ég fór eftir nokkrum einföldum grundvallaratriðum. Þegar það var hægt ók ég aðeins að degi til í „hippabílnum“ mínum til að vekja ekki athygli á mér, ég ók aðeins eftir þeim vegum sem ég þurfti að fara um og það mikilvægasta var að ég ögraði lögreglunni aldrei. Það þýðir að ég framdi engin afbrot og rændi aldrei neinum,“ segir meðal annars í bréfunum.
„Að því sögðu þá var það álíka fjarstæðukennt í mínum huga að nema einhvern á brott eins og að hefja kjarnorkustyrjöld eða slátra kjúklingi. Ég sé enga ástæðu til að tjá mig um ásakanir ákæruvaldsins. Í raun get ég bara hallað mér aftur og slappað af og beðið eftir að sjá hvað þeir finna,“ skrifaði hann einnig að sögn Sky News.
Þetta er í fyrsta sinn sem Christian B tjáir sig um ásakanirnar um að hann hafi verið viðriðinn hvarf Madeleine en ekkert hefur spurst til hennar eftir að hún hvarf. Þýska lögreglan hefur sagt að hún sé látin en vildi ekki skýra frá á hvaða grunni hún byggir þá fullyrðingu.
Hans Christian Wolters, saksóknarinn sem stýrir rannsókn málsins, sagði í samtali við Mirror í fyrra að hann sé þess fullviss að Christian B hafi myrt Madeleine eftir að hann nam hana á brott. Hann sagði einnig að lögreglan sé með sönnunargögn fyrir þessu en skýrði ekki frá hver þau eru.
