Þann 19. desember létust Alvaro og Sylvia Fernandez, sem bjuggu í Loma Linda í Kaliforníu, af völdum COVID-19. Aðeins liðu nokkrar klukkustundir á milli andlátanna. Þau láta eftir sig fjögur börn. Alvaro var fullur efasemda um bóluefnin gegn kórónuveirunni og hafði því ekki látið bólusetja sig og það sama átti við um Sylvia.

Sky News skýrir frá þessu. Alvaro var 44 ára og Sylvia 42 ára. Alma Hernandez, systir Alvaro, sagði í samtali við NBC Los Angeles að bróðir hennar hafi viljað afla sér frekari upplýsinga um bóluefnin. Hann hafi leitað að upplýsingum og hafi ekki viljað trúa öllu sem var sagt í fréttum.

„Þetta opnar augu allra í fjölskyldunni fyrir því að þeir sem eru ekki bólusettir eigi að láta bólusetja sig,“ sagði hún og bætti við að Alvaro hafi verið með undirliggjandi sjúkdóma, þar á meðal sykursýki.

Alvaro og Sylvia höfðu verið par síðan þau voru 17 og 15 ára en þau kynntust í menntaskóla. Þau voru gift í 25 ár.

Þau greindust bæði með COVID-19 nokkrum dögum áður en þau létust. Þau láta eftir sig fjögur börn, þar á meðal 17 ára tvíbura.