Kyer Hoskin, 29 ára gömul kona, er allt annað en ánægð eftir að leigubílstjóri smánaði hana fyrir að vera feit. The Sun greinir frá því að Kyler hafi ætlað að taka leigubíl í Cambridge á Englandi en hún segir leigubílstjórann hafa litið upp og niður þegar hann sá hana og sagt svo við hana að hún þurfi stærri bíl.

Konan segir að hún hefði ekki átt í neinum vandræðum með að komast inn í bílinn. Hún segir líka að hún hefði getað notað bílbeltið í bílnum án framlengingar þar sem hún tók leigubíl fyrr um morguninn til að komast ferða sinna.

„Hann leit á mig og horfði upp og niður þegar ég var við það að fara aftur í leigubílinn og sagði: „Heldurðu að þú þurfir ekki að taka stærri bíl eins og þennan þarna?“ Ég sagði þá: „Ég er ekki að fara í bílinn þinn ef þú ætlar að láta svona“ og fór svo í annan leigubíl.“

Næsti leigubílsstjóri tók á móti Kyer með glöðu geði. Þegar hún sagði þeim leigubílstjóra hvað hinn leigubílstjórinn sagði við hana þá hneykslaðist hann. „Hann sagði að það væri ógeðslegt og ég spurði hvort svo væri í alvörunni því þetta er svo eðlilegt fyrir mér, ég fæ að heyra svona nokkuð oft.“

Kyer segir að athugasemdir eins og þessar geri hana frekar reiða. „Þetta gerir mig reiða, enginn á að tala svona við mig en ég er orðin nokkuð vön því,“ segir hún. „Í vikunni á undan var næstum keyrt á mig þegar ég var á vespunni minni og fólkið sem keyrði á mig kallaði mig feita tík.“

Að lokum segir Kyer að vandamálið liggi ekki í holdarfari hennar. „Það er ekki stærðin mín sem er vandamál, það er fáfræðin.“