Mörg vitni hafa komið fyrir dóm fram að þessu. Þar á meðal ráðsmaðurinn á lúxusheimili Epstein í Flórída en hann sagðist hafa séð margar barnungar stúlkur í húsinu. Annað vitni er Virginia Guiffre sem hefur sakað Andrew Bretaprins um að hafa beitt sig kynferðisofbeldi.
Á mánudaginn kom kona ein í vitnastúkuna. Ekki hefur verið skýrt frá fullu nafni hennar en hún er kölluð Kate. CNN segir að hún hafi sagt að Maxwell hafi sagt henni að Epstein þyrfti að stunda kynlíf þrisvar á dag. Hún sagði einnig að það hafi verið Maxwell sem skipulagði fyrsta fund hennar með Epstein. Hún var orðin 17 ára þegar þetta átti sér stað og því telst hún ekki með þeim fórnarlömbum Epstein og Maxwell sem voru á barnsaldri.
Kate sagðist hafa hitt Maxwell í fyrsta sinn þegar hún var 17 ára. Þá hafi áreitið hafist. Hún sagði að Maxwell hafi sagt henni að Epstein gæti aðstoðað hana við að ná frama á tónlistarsviðinu.
Nokkrum vikum eftir að Kate hitti Maxwell í fyrsta sinn var henni boðið heim til Epstein og Maxwell. Kate sagði fyrir dómi að Maxwell hafi beðið hana um að grípa í fótlegg Epstein til að hann gæti fundið hversu sterk hún væri.
Nokkrum vikum síðar spurði Maxwell hana hvort hún vildi koma og nudda Epstein því hún væri svo sterk. Í þeirri heimsókn átti Epstein frumkvæði að kynlífi. Henni var síðan boðið aftur heim til þeirra og kynferðislega ofbeldið hélt þá áfram.
Kate sagði einnig að Maxwell hafi talað töluvert um vini sína, þar á meðal Andrew prins og Donald Trump, fyrrum Bandaríkjaforseta.
