Boris Johnsson, forsætisráðherra Bretlands, hefur boðað útgöngubann í Bretlandi í kjölfar gríðarlegrar fjölgunar COVID-19 smita. Útgöngubannið nær yfir England en ekki Stóra-Bretland.
Staðan í Bretlandi er ákaflega slæm en í gær greindust 54.990 einstaklingar með Covid-19. Yfir 75.000 manns hafa látist þar í landi úr Covid-19 og er sú dánartíðni sú hæsta í Evrópu. Engin landamæraskimun hefur verið í Bretlandi.
Tíðindin koma ekki á óvart en sérfræðingar hafa spáð því í allan daga að forsætisráðherrann myndi boða útgöngubann.
Johnson sagði að aðgerðir sem gripið var til hingað til hefðu dugað til að hemja veiruna en allt hafi breyst með nýju afbrigði veirunnar sem er miklu meira smitandi. Hann sagði jafnframt að sjúkrahús í landinu hefðu aldrei áður verið undir jafn miklu álagi vegna faraldursins og núna.
Fólki verður fyrirskipað að halda sig heima við fyrir utan bráðnauðsynlegar aðgerðir á borð við matarinnkaup og að sækja nauðsynlega heilbrigðisþjónustu. Skólar verða lokaðir frá og með morgundeginum en tekin verður upp fjarkennsla.
Forsætisráðherrann sagði að vikurnar framundan yrðu þær erfiðustu til þessa síðan faraldurinn reið yfir. En bóluefni muni fyrr en síðar skila þeim árangri að hægt verði að aflétta hömlum að nýju.
Í lok ávarpsins hvatti Johnsons fólk til að halda kyrru fyrir heima, vernda þar með heilbrigðiskerfið og bjarga mannslífum.
Talið er að útgöngubannið verði í gildi fram í 15. febrúar en eðlilega eru lok þess háð þróun faraldursins á næstu vikum.
