Saksóknari í Braunschweig í Þýskalandi vonast til að gefin verði út ákæra á þessu ári á Christian Brückner, alræmdan barnaníðing og kynferðisbrotamann, en hann er grunaður um að vera valdur að hvarfi Madeleine McCann, bresks stúlkubarns sem hvarf úr hótelíbúð í Algarve í Portúgal vorið 2007, er hún var fjögurra ára.
Christian Brückner bjó í Algarve um það leyti sem barnið hvarf en hann afplánar nú í fangelsi í Braunschweig dóma fyrir kynferðisbrot og er til rannsóknar vegna fleiri brota. Þýskir og portúgalskir rannsakendur hyggjast á næstunni yfirheyra að nýju lykilvitni í málinu, fólk sem þekkti Brückner í Algarve á umræddum tíma. Þýska lögreglan og saksóknari í Braunschweig eru sannfærð um að Christian Brückner hafi numið stúlkuna á brott og myrt hana.
Hefur verið lagður aukinn kraftur í rannsóknina. Sérfræðingar segja þetta vera þýðingarmikið skref til þess að upplýsa málið á endanum. Vonast er til að framburður vitnanna verði til að draga upp heildarmynd sem geri lögreglu kleift að yfirheyra Brückner beint um málið. Þá er stefnt að stórum fundi milli breskra og portúgalskra rannsóknarmanna um málið í vor.
Hans Christian Wolters, saksóknari í Braunschweig, segist ekki geta fullyrt hvort gefin verður út ákæra á Brückner á þessu ári eða ekki.