Frá nóvember á síðasta ári og fram í janúar á þessu ári herjuðu verstu þurrkar í 40 ár á suðurhluta eyjunnar. Þetta hefur þau áhrif að uppskeran á næstu mánuðum verður tæplega helmingur af því sem hún er venjulega. Miklir þurrkar hafa verið á eyjunni síðustu sex árin og bættu þurrkarnir í nóvember og fram í janúar gráu ofan á svart.
SÞ segja að þurrkarnir valdi því að rúmlega ein milljón manna skorti sárlega mat. The Guardian hefur eftir Julie Reversé, hjá samtökunum Læknar án landamæra, að það skipti öllu fyrir eyjaskeggja að uppskeran bregðist ekki því að íbúarnir á suðurhluta eyjunnar séu algjörlega háðir uppskerunni til að fá mat og peninga fyrir það sem þeir geta selt af henni. „Án regns geta þeir ekki haldið út á akrana og brauðfætt fjölskyldur sínar. Sumir hika ekki við að segja að dauðinn bíði þeirra ef ástandið breytist ekki og rigningin kemur ekki,“ er haft eftir henni.
Hungrið hefur orðið til þess að fólk hefur gripið til örþrifaráða til að lifa af. Hjálparsamtök segja að fólk borði engisprettur, termíta, laufblöð og leir.
Það bætti ekki úr skák að í desember skall mikill sandstormur á og þakti akrana með sandi.
Matarhjálp SÞ segir að vannæring meðal barna yngri en fimm ára hafi næstum tvöfaldast á síðustu fjórum mánuðum á flestum svæðum í suðurhluta landsins. Vannæring og skortur á hreinu drykkjarvatni veldur síðan niðurgangi, malaríu og öndunarfærasýkingum. Talsmenn SÞ segja að fullorðnir þjáist einnig af vannæringu og að staðan sé mjög alvarleg. Fólk sé á ystu brún hungursneyðar.
Landbúnaður, fiskveiðar og skógarhögg eru undirstaðan í efnahagslífi eyjunnar og standa undir rúmlega 25% af vergri þjóðarframleiðslu og sjá um 80% vinnandi fólks fyrir vinnu samkvæmt tölum frá Alþjóðabankanum. Landbúnaðurinn er í mikilli hættu vegna ófyrirsjáanlegs og öfgakennds veðurfars sem er afleiðing loftslagsbreytinganna. Hækkandi hiti á heimsvísu og staðsetning eyjunnar í Indlandshafi gerir að verkum að hún er nokkurskonar skotskífa fellibylja, þurrka, flóða og landeyðingar.
