Til að koma í veg fyrir uppsagnir og launalækkanir ætlar bandaríska flugfélagið American Airlines að leita á náðir ríkisins og biðja um aðstoð. Fyrirtækið hyggst sækja um allt að 12 milljarða dollara ríkisaðstoð.

Þetta kemur fram í tilkynningu sem stjórnendur fyrirtækisins sendu starfsfólki þess á mánudaginn. Reuters skýrir frá þessu. Í tilkynningunni er haft eftir Doug Parker, forstjóra félagsins, að stjórnendur þess voni og eigi ekki von á öðru en American Airlines muni aftur hefja starfsemi þegar tekist hefur að ná stjórn á COVID-19 faraldrinum.

Eins og víðast í heiminum hefur flug nær algjörlega lagst af í Bandaríkjunum vegna aðgerða til að hemja útbreiðslu COVID-19. American Airlines hefur aflýst rúmlega helmingi flugferða sinna um óákveðinn tíma. Í síðustu viku sagði Parker að félagið færi nú aðeins helming fyrirhugaðra ferða innanlands og sætanýtingin væri í þessum ferðum væri undir 15 prósentum. Hann sagði að félagði muni fækka ferðum um 60 prósent í apríl og 80 prósent í maí.

Rúmlega 133.000 manns starfa hjá American Airlines.