44.236 knattspyrnuáhugamenn höfðu lagt leið sína á leikvanginn til að fylgjast með leik Atalanta og Valencia í átta liða úrslitum Meistaradeildar Evrópu.
„Allt passar. Það er mánuður síðan leikurinn var. Tíminn skiptir miklu máli. Auk þess voru mörg þúsund manns samankomnir, tvo sentimetra frá hvert öðru, æsingur, öskur og faðmlög sem gætu hafa ýtt undir útbreiðslu veirunnar.“
Hefur Corriere dello Sport eftir Francesco Le Foche, lækni og ónæmisfræðingi.
Nú um mánuði síðar er Bergamo miðpunktur COVID-19 faraldursins á Ítalíu. Knattspyrnuliðið Atalanta er frá borginni. Sjúkrahús í borginni eru yfirfull, líkkistum er ekið frá borginni í herflutningabílum, útfarir fara fram á 30 mínútna fresti.
Le Foche, sem starfar á Policlincio Umberto (næststærsta sjúkrahúsi Ítalíu) í Róm, segir að nokkrir þættir hafi valdið því að sjúkdómurinn breiddist svo hratt út.
„En einn stærsti þátturinn gæti hafa verið þessi leikur.“
Sagði hann.
Nokkrir „fullkomnir“ þættir voru til staðar til að ýta undir dreifingu veirunnar þetta kvöld.
COVID-19 veiran var ekki enn kominn efst á lista yfir mál málanna á Ítalíu þennan dag og því var ekki mikið rætt um smithættuna. Af þeim sökum var völlurinn þéttsetinn. Nokkrum dögum síðar var byrjað að aflýsa knattspyrnuleikjum á Ítalíu vegna smithættu.
Vegna framkvæmda við heimavöll Atalanta í Bergamo fóru mörg þúsund stuðningsmenn liðsins 100 km í gegnum Langbarðaland til Mílanó til að horfa á leikinn. Síðan fóru þeir heim aftur. Þeir ferðuðust í járnbrautarlestum, strætisvögnum og bílum.
Þetta var í fyrsta sinn sem Atalanta komst svona langt í Meistaradeildinni og því var áhugi borgarbúa á leiknum mjög mikill.
Atalanta vann leikinn örugglega og það hafði í för með sér mikil fagnaðarlæti, faðmlög og nærveru fólks.
Aldrei fyrr höfðu svo margir mætt á heimaleik Atalanta og skipti þá engu að leikurinn var spilaður í Mílanó.
Allt þetta veldur því að Le Foche telur að leikurinn gæti hafa verið stór smitsprengja.