Kínversk heilbrigðisyfirvöld skýrðu frá þessu í morgun. Einnig kemur fram í tilkynningu yfirvalda að enginn með fasta búsetu í Kína hafi greinst með COVID-19 á meginlandinu síðasta sólarhringinn. 34 smit greindust en þau voru öll í útlendingum.
Þetta eru svo sannarlega góðar fréttir af baráttu Kínverja gegn veirunni sem hefur kostað 3.245 manns lífið þar í landi. Flestir hafa látist í Hubeihéraðinu þar sem borgin Wuhan er.
Átta létust af völdum veirunnar í gær. Samtals hafa 80.928 greinst með veiruna í Kína. Af þeim hafa rúmlega 70.000 náð sér.
Frá Suður-Kóreu, þar sem ástandið er næstverst í Asíu, fjölgaði smitum þriðja daginn í röð samkvæmt tölum frá heilbrigðisyfirvöldum. 152 smit greindust og sjö létust síðasta sólarhringinn.
Samtals hafa 8.565 smit greinst í Suður-Kóreu og hafa 1.500 hinna smituðu náð sér.
Samkvæmt tölum frá John Hopkins sjúkrahúsinu í Bandaríkjunum hafa rúmlega 218.000 greinst með COVID-19 í heiminum. Víða eru ekki tekin sýni úr öllum þeim sem sýna sjúkdómseinkenni og því gæti talan verið miklu hærri. Um 8.800 manns hafa látist af völdum COVID-19 í heiminum öllum. Flestir í Kína, 3.245, en þar á eftir kemur Ítalía þar sem 2.978 hafa látist.
