Bandaríska netverslunin Amazon nýtur góðs af hversu margir vinna heima þessa dagana vegna COVID-19 veirunnar. Það kemur fyrirtækinu einnig vel að fólk heldur sig meira heima við en áður til að forðast smit. Af þessum sökum hefur fólk meiri tíma til að skoða úrvalið hjá netversluninni og hefur salan aukist mikið. Svo mikið að fyrirtækið ætlar nú að fjölga starfsfólki sínu um 100.000 og hækka laun.

Dave Clark, sem hefur yfirumsjón með lager og dreifingarkerfi fyrirtækisins, segir að mikil söluaukning hafi orðið og það hafi í för með sér að fyrirtækið þurfi að fjölga starfsfólki mikið, aldrei fyrr hafi verið svona mikil þörf fyrir svo margt starfsfólk á þessum árstíma.

Fyrirtækið tilkynnti einnig að það ætli að hækka tímakaup starfsfólks um tvo dollara á tímann fyrir lok apríl.

Byrjað er að auglýsa lausar stöður og er um blöndu af hlutastörfum og heilsdagsstörfum að ræða.