Það skal strax tekið fram að um er að ræða spá sem gerir ráð fyrir því versta og segir fulltrúi breskra stjórnvalda að það þýði ekki að spáin muni rætast. Nauðsynlegt sé þó að gera ráð fyrir öllum þáttum enda óvissuþættirnir enn margir. Ef þessi spá rætist gætu rúmlega 50 milljónir manna í Bretlandi fengið veiruna og allt að 500 þúsund manns látist.
Í frétt The Sun, sem til dæmis Telegraph vitnar til, kemur fram að þessar tölur séu að finna í skýrslu breskra stjórnvalda sem ber yfirskriftina: Covid-19 Reasonable Worst Case Scenario.
Í skýrslunni er einnig fjallað um það mikla álag sem gæti myndast á breskum heilbrigðisstofnunum, um tvær milljónir manna gætu þurft að leggjast inn á sjúkrahús fari allt á versta veg.
Tilfellum COVET-19 kórónaveirunnar heldur áfram að fjölga. Í morgun var greint frá því að þrjú ný tilfelli hefðu komið upp í Frakklandi. Sautján hafa nú smitast þar í landi og tveir látist. Þá greindu yfirvöld í Íran frá því að 19 væru látnir af völdum veirunnar þar í landi og 44 ný tilfelli hefðu verið staðfest. Eru staðfest smit í Íran nú orðin 139.
Yfirvöld í Kúveit greindu svo frá því í morgun að sex ný tilfelli hefðu greinst þar og eru þau nú orðin átján samtals. Þá greindu yfirvöld í Suður-Kóreu frá því að 115 ný tilfelli hefðu greinst á síðastliðnum sólarhring. Eru staðfest tilfelli nú orðin 1.261.