Ef ökumenn hafa of hátt í umferðinni mun það taka þá enn lengri tíma að komast leiðar sinnar. Þetta er grunnhugmyndin á bak við nýja gerð umferðarljósa sem er verið að prófa í Mumbai á Indlandi. Þar eru lögreglan og fjölmargir borgarar hundleiðir á þeirri miklu hávaðamengun sem fylgir umferðinni og þá sérstaklega ökumönnum sem þeyta bílflautur sínar í gríð og erg.

Lögreglan í borginni segir að Mumbai  sé flautuhöfuðborg heimsins því ökumenn ráði ekki við sig. Þeir flauti jafnvel þegar þeir bíða á rauðu ljósi til að reyna að flýta ljósaskiptunum en það gerist auðvitað ekki.

En framvegis verður ekki skynsamlegt að flauta þegar beðið er á rauðu ljósi því það mun bara seinka því að ljósin skipti yfir í grænt. Hljóðmælum verður komið fyrir á gatnamótum. Þeir verða tengdir við stjórnkerfi umferðarljósa og ef hávaðinn fer yfir 85 desibel byrja þau upp á nýtt að telja niður að ljósaskiptum.

Raunar hófst tilraunin í nóvember á einum gatnamótum og hefur gefið svo góða raun að nú á að auka umfang hennar og prófa sama fyrirkomulag við fleiri gatnamót. CNN skýrir frá þessu.