Boris Johnson, forsætisráðherra Bretlands, er kominn í sóttkví. Þetta gerðist eftir að í ljós kom að þingmaðurinn Lee Anderson var með COVID-19 en Johnson fundaði nýlega með honum. Anderson fékk einkenni COVID-19 og fór í sýnatöku og var niðurstaðan jákvæð.

Sky News skýrir frá þessu. Fram kemur að rakningateymi heilbrigðisyfirvalda hafi haft samband við Johnson og sagt honum að hann þyrfti að fara í sóttkví vegna smits Anderson.

Johnson tísti um þetta og sagði: „Ég er ekki með nein einkenni en fylgi reglum og mun sinna störfum mínum frá Downingstræti 10 og halda áfram að stýra aðgerðum ríkisstjórnarinnar gegn heimsfaraldrinum.“

Johnson og Anderson funduðu í um 35 mínútur í Downingstræti 10 síðasta fimmtudagsmorgun. Fleiri þingmenn voru einnig á fundinum. Þar á meðal Andy Carter sem tilkynnti einnig í gær að hann væri farinn í sóttkví.

Johnson greindist með COVID-19 í mars og lá á gjörgæsludeild í þrjá sólarhringa.