Á miðnætti í kvöld, að staðartíma, geta íbúar í Melbourne í Ástralíu fagnað því að umfangsmikilli lokun á margvíslegri samfélagsstarfsemi verður aflétt. Því geta tæplega 5 milljónir íbúar borgarinnar upplifað frelsi á nýjan leik.

Daniel Andrews, forsætisráðherra í Viktoríuríki, tilkynnti þetta á fréttamannafundi í gær.

„Ég er mjög glaður yfir að geta tilkynnt að frá klukkan 23.59 á þriðjudaginn má opna verslanir á nýjan leik. Veitingahús, hótel, kaffihús og barir munu einnig opna á nýjan leik,“

sagði hann.

Á miðvikudaginn eru 87 dagar síðan gripið var til harðra aðgerða í Melbourne og nágrenni vegna heimsfaraldurs kórónuveirunnar. Fólk mátti ekki fara lengra en 5 km frá heimili sínu og útgöngubann var sett að næturlagi. Dpa skýrir frá þessu.

Gripið var til þessara aðgerða í kjölfar mikillar aukningar á smitum en þau breiddust út frá hótelum þar sem fólk var í sóttkví eftir komuna frá útlöndum.

En frá miðnætti á miðvikudaginn verður lífið líkara því sem það var áður í Melbourne en borgarbúar þurfa þó að sæta ferðatakmörkunum sem gilda í 25 km radíus frá heimili þeirra þar til þann 8. nóvember.

Andrews tilkynnti um tilslakanirnar eftir að ekkert nýtt smit greindist í gær en það var í fyrsta sinn síðan 9. júní sem það gerist.