Óhugnanlegt mál skekur nú samfélagið í Odessa í Texas í Bandaríkjunum. Þar var lögreglan nýlega send að heimili einu þar sem Jaylin Anne, 8 ára, fannst látin. Rannsókn málsins hefur leitt í ljós að fósturforeldrar hennar voru að refsa henni og meinuðu henni um morgunmat. Hún var síðan send út í garð og sagt að hoppa á trampólíni í langan tíma. Hún fékk ekkert að drekka.
People skýrir frá þessu. Fram kemur að 40 stiga hiti hafi verið þegar hún var send út. Krufning leiddi í ljós að dánarorsök hennar var ofþornun.
Fósturforeldrar hennar, sem eru 44 og 34 ára, hafa verið handtekin, grunuð um að hafa orðið henni að bana.
Jaylin Anne er sögð hafa verið lífsglöð stúlka sem elskaði að fara á hestbak og skauta og að stunda aðrar íþróttir utanhúss.
