Danskt efnahagslíf hefur verið í miklum blóma á undanförnum misserum og sjaldan eða aldrei hefur atvinnuástandið verið jafn gott og núna. En ef litið er á tölur yfir gjaldþrot fyrirtækja má sjá að ekki gengur allt eins vel. Á síðasta ári urðu 8.520 fyrirtæki gjaldþrota og hafa gjaldþrotin aldrei verið fleiri.

Þetta kemur fram í skýrslu frá greiningarfyrirtækinu Experian. Aukningin nemur 19 prósentum miðað við 2018 og 35 prósentum miðað við 2017.

Jótlandspósturinn hefur eftir Bo Rasmussen, hjá Experian, að sú hugsun læðist að, þegar svona háar tölur sjást, að eitthvað sé að gerast í efnahagslífinu. Að hugsanlega sé að draga úr þeim mikla hagvexti sem verið hefur undanfarin misseri.

Á bak við þessar tölur leynast ýmis atriði sem geta skýrt af hverju þróunin var svona neikvæð á síðasta ári. Í apríl samþykkti þingið að breyta lögum um svokölluð frumkvöðlafyrirtæki. Var þá ekki lengur hægt að stofna slík fyrirtæki en þau var hægt að stofna með aðeins 1 krónu í hlutafé. Samkvæmt lögunum varð einnig að breyta öllum starfandi frumkvöðlafyrirtækjum í hlutafélög fyrir apríl á næsta ári, að öðrum kosti yrðu þau leyst upp. Mun meira hlutafé þarf í slík fyrirtæki.

Experian segir að um 40 prósent af gjaldþrotum síðasta árs séu tilkomin vegna frumkvöðlafyrirtækja og það skekki myndina því töluvert. Ekki sé því um að ræða að efnahagur landsins sé að leggjast á hliðina eða neitt slíkt.