Áströlsk yfirvöld – og yfirvöld annarra ríkja – reyna nú að koma þegnum sínum til síns heima. Allt áætlunarflug til og frá borginni liggur niðri og þá hafa verulegar takmarkanir verið settar á aðra samgöngumáta. Íbúar í borginni hafa verið hvattir til að halda sig innandyra til að takmarka líkur á enn meiri útbreiðslu veirunnar. Staðfest dauðsföll af völdum veirunnar eru rúmlega hundrað í Kína og þá eru staðfest smit í Hubei-héraði, þar sem Wuhan er stærsta borgin, orðin rúmlega 2.700.
Búið er að staðfesta smit í mörgum löndum; Þýskalandi, Bandaríkjunum, Taílandi, Taiwan, Japan, Suður-Kóreu, Víetnam, Singapúr, Malasíu, Nepal, Frakklandi, Kanada, Ástralíu og Sri Lanka.
Boris Johnson, forsætisráðherra Bretlands, sagði í morgun að þarlend yfirvöld væru einnig að reyna að koma breskum ríkisborgurum heim. Ekki liggur fyrir hversu margir þeir eru. Þá segja japönsk yfirvöld að yfirvöld í Kína hafi heimilað flutning á 650 Japönum frá Wuhan.
Ljóst er að íbúar margra landa eru áhyggjufullir og til marks um það hafa yfir 500 þúsund manns í Suður-Kóreu skrifað undir áskorun þess efnis að ferðalöngum frá Kína verði bannað að koma til landsins þar til tekist hefur að hefta útbreiðslu veirunnar.
Í morgun var greint frá fyrstu tilfellum um smit milli manna í Evrópu. Þjóðverji, sem ekki hafði ferðast til Kína, smitaðist af kínverskri samstarfskonu sinni. Í morgun var einnig greint frá sambærilegu tilviki í Japan þar sem japanskur karlmaður, sem ekki hefur ferðast til Kína, smitaðist. Maðurinn, sem er á sjötugsaldri, starfar sem rútubílstjóri. Þá var greint frá því í morgun að yfirvöld í Hong Kong hefðu ákveðið að stöðva lestarsamgöngur milli sjálfstjórnarsvæðisins og meginlands Kína.
