Gróðureldar, flóð og öflug óveður herjuðu á Evrópu á síðasta ári. Einnig hrellti öflug hitabylgja álfuna og hitamet féllu eitt af öðru. Margir sérfræðingar telja erfitt að reyna að halda því fram að öll þessi met séu tilviljun ein. Í Belgíu, Hollandi, Lúxemborg, Þýskalandi, Frakklandi og Bretlandi féllu hitamet á árinu. Þar mældist hæsti hiti sem nokkru sinni hefur mælst. Í öllum löndunum, að Frakklandi undanskildu, féllu metin í júlí, en þá skall öflug hitabylgja á norðurhluta evrópska meginlandsins.
Þessi met komu mörgum veðurfræðingum og loftslagssérfræðingum ekki á óvart. Þeir segja þetta draga upp mynd af ákveðinni þróun og hún muni halda áfram og frekari veðuröfgar muni dynja á Evrópu.
Nýlega sendi Veðurfræðistofnun Sameinuðu þjóðanna, WMO, frá sér skýrslu um veðurfar á síðasta ári. Í henni kemur fram að árið var það næsthlýjasta á jörðinni frá því að mælingar hófust. Aðeins 2016 var hlýrra á heimsvísu. Petteri Taalas, forstjóri WMO, sagði í tengslum við birtingu skýrslunnar að „miðað við núverandi losun á CO2 stefni í að hitastigið hækki um þrjá til fimm gráður fyrir næstu aldamót.“
Margir sérfræðingar telja að helsta ástæðan fyrir hækkandi hita á jörðinni sé aukið magn CO2 í andrúmsloftinu. Rétt er þó að hafa í huga að ekki eru allir þessarar skoðunar en þó virðast fleiri en færri hallast að þessari kenningu. Frá því að veðurmælingar og skráning hófst almennt í lok nítjándu aldar hafa ákveðnar sveiflur sést á löngum tímabilum en á síðustu árum hefur þróunin verið öðruvísi. Á heimsvísu hækkar hitastigið frá ári til árs og hitastig sem var áður flokkað sem öfgakennt er nú að verða meðalhitastig.
En það er ekki bara hitinn sem hækkar því loftslagsbreytingarnar valda því einnig að veðrið breytist og verður öfgafyllra. Slík veður geta haft mikil samfélagsleg áhrif og því stöndum við frammi fyrir miklum áskorunum. Til dæmis má nefna að loftslagsráð Sameinuðu þjóðanna, IPCC, spáir því að flóð, sem áður áttu sér að meðaltali stað á 100 ára fresti, verði árlegur viðburður þegar kemur fram að næstu aldamótum.
Gróðureldar eru einnig einn fylgifiskur öfgaveðurs en þeir komu illa við Evrópu á síðasta ári. Verst var ástandið í Portúgal og Katalóníu á Spáni. Í Feneyjum flæddi sjór margoft um götur borgarinnar og hlaust mikil eyðilegging af. Í suðurhluta Frakklands rigndi hvað eftir annað gríðarlega og hlaust mikið tjón af og í nóvember létust sex vegna flóða þar.
Ekki má gleyma jöklum álfunnar sem bráðna nú vegna hærri hita en áður. Þessu höfum við fengið að kenna á hér á landi og sömu sögu er að segja frá Sviss, Frakklandi og Noregi.
