Scott Morrison, forsætisráðherra, sagði um helgina að ástralski ferðamannaiðnaðurinn stæði nú frammi fyrir stærstu áskorun sinni til þessa. Eitt af hverjum þrettán störfum í landinu tengist greininni á einn eða annan hátt.
Erlendum ferðamönnum í landinu hefur fækkað um 10 til 20 prósent síðan eldarnir kviknuðu í september. Atec, samtök ferðamannaiðnaðarins, telja að tekjutapið vegna eldanna nemi 4,5 milljörðum ástralskra dollara. Það svarar til um 370 milljarða íslenskra króna.
Fjárhagsaðstoðin frá ríkinu á að renna til markaðssetningar innanlands og utan.
Ríkisstjórnin ætlar einnig að verja sem svarar til um 3,7 milljarða íslenskra króna til að bjarga dýra- og plöntulífi en það hefur farið illa út úr eldunum.
Eldarnir hafa nú þegar orðið að minnsta kosti 29 manns að bana og eyðilagt rúmlega 2.500 heimili. Líffræðingar telja að um einn milljarður dýra hafi orðið eldunum að bráð.