Í síðustu viku voru tveir ungir menn sakfelldir af dómara í Noregi fyrir að hafa tattóverað getnaðarlim á bak vinar síns. Fyrir dómi kom fram að þrír menn hefðu fengið vin sinn, fórnarlambið, til að koma með þeim undir því yfirskyni að þeir væru á leið í samkvæmi. Þeir sóttu hann í Buskerud og fóru síðan með lest til Øvre Romerrike. Á lestarstöðinni þar byrjuðu þeir að beita manninn ofbeldi.

Ofbeldið hélt áfram á leið frá lestarstöðinni til áfangastaðar þeirra sem var íbúð í um eins kílómetra fjarlægð. Þegar í íbúðina var komið tattóveruðu tveir af mönnunum þá getnaðarlim á bak mannsins. Hann gaf samþykki sitt fyrir að þeir myndu tattóvera hann en vissi ekki hvernig mynd þeir ætluðu að tattóvera á hann. Auk myndar af getnaðarlimi tattóveruðu þeir orðin „nauðgari“ og „typpi“ á bakið.

Í dómsorði sínu bendir dómarinn á að fórnarlambið hafi ekki þorað að mótmæla tillögunni um að hann skyldi fá húðflúr á bakið. Á meðan verið var að tattóvera hann heyrði hann einn ofbeldismannanna segja: „Vá, hvað þetta er fínn engill“. Dómarinn segir einnig að jafna megi tattóinu við alvarlegt ofbeldi á við smá skurðáverka, minniháttar beinbrot í andliti, handleggjum og fingrum eða tjóns á tönnum.

Ofbeldið var skipulagt að mati dómarans.

Tveir af mönnunum voru dæmdir í óskilorðsbundið fangelsi en sá þriðji í 45 daga skilorðsbundið fangelsi. Allir eiga þeir sakaferil að baki. Þeir þurfa einnig að greiða fórnarlambinu bætur.