Engin Hróarskelduhátíð verður haldin þetta árið en ástæðan er að sjálfsögðu heimsfaraldur kórónuveiru. Hátíðin í ár hefði verið sú fimmtugasta í röðinni. En skipuleggjendur hátíðarinnar halda ótrauðir áfram og stefna á að halda hátíðina á næsta ári. Þessu hefur verið vel tekið, svo vel að nú er uppselt á hana.

Þeim, sem höfðu keypt miða á hátíðina í ár, var boðið að skipta miðanum fyrir miða á hátíðina á næsta ári. Þessu var gríðarlega vel tekið og nýttu 85% miðakaupenda sér þetta tilboð. Eftir voru 12.000 miðar og voru þeir settir í sölu á þriðjudaginn og kláruðust nær samstundis.

Það hélt ekki aftur af fólki að ekki er vitað hvaða listamenn munu koma fram á hátíðinni að ári.

Á heimasíðu hátíðarinnar segir að þar á bæ sé fólk gríðarlega hamingjusamt og þakklátt fyrir það mikla traust sem hátíðinni er sýnt með þessum góðu viðtökum fólks.