Meðal þeirra kenninga og mýta sem nú ganga eru nokkrar sem hafa náð eyrum margra. Skemmst er að minnast að mörg hundruð Íranir létust í síðustu viku eftir að hafa drukkið áfengi sem innihélt metanól (tréspíra) því sú saga hafði gengið á samfélagsmiðlum að hægt væri að koma í veg fyrir smit með að drekka áfengi.
Breski læknirinn Claudia Pastides, hjá Babylon Health, hefur kíkt á nokkrar af helstu mýtunum og kenningunum sem nú ganga.
Kórónuveiran var búin til af mönnum. Veiran, sem veldur COVID-19, á rætur að rekja til dýra. Hún virðist hafa stökkbreyst og borist úr dýrum yfir í menn. Hún er sem sagt ekki búin til í tilraunastofu.
Handspritt drepur ekki kórónuveiru. Sumar veirur og bakteríur drepast ekki þótt handspritt sé notað. Það á þó ekki við um COVID-19 ef þú notar handspritt sem inniheldur minnst 60 prósent alkóhól.
Gæludýr geta verið smitberar. Það eru engar sannanir fyrir því að COVID-19 veiran smitist með gæludýrum. Það er þó rétt að hafa þann varnagla á að veiran er ný og vísindamenn fylgjast náið með hvort smit berist á milli dýra og manna. Af þeim sökum ættir þú alltaf að þvo þér vel um hendurnar eftir að hafa snert gæludýr.
Heitt bað drepur veiruna. Ef veiran kemst inn í líkamann þá er það ónæmiskerfið sem sér um að drepa hana. Heitt bað eða heitir drykkir geta alls ekki komist að veiru sem er í frumum líkamans né drepið hana. Líkaminn stýrir sjálfur hita sínum og bregst mjög takmarkað við heitum drykkjum eða baði. Ef þú vilt fara í bað til að drepa veirur á húðinni þá er best að þvo sér um hendurnar með vatni og sápur. Ef þú kemst ekki í vatn og sápu er best að nota handspritt.
Ef þú skolar munninn með klór er hægt að koma í veg fyrir smit. Klór getur valdið bruna, bæði á húð og innvortis. Ef þú ert heppin(n) sleppur þú með húðpirring og magaverki. En óháð því á ekki að skola munninn með klór. Það virkar heldur ekki gegn COVID-19. Það virkar heldur ekki að skola munninn með vatni, heitum drykkjum eða nokkru öðru til að koma í veg fyrir smit. Það er þó hægt að nota klór til að koma í veg fyrir að veiran breiðist út en þá til að þrífa yfirborðsfleti á borð við til dæmis eldhúsborð.
Hvítlaukur getur komið í veg fyrir smit. Það er alltaf góð hugmynd að borða hollan og fjölbreyttan mat sem inniheldur ávexti og grænmeti, þar á meðal hvítlauk, en það eru engar sannanir fyrir að hvítlaukur veiti vernd gegn COVID-19.
