Hvað myndi þér finnast um að búa í húsi þar sem veggirnir tala við þig á nóttunni? Þetta gæti eiginlega verið lýsing á lélegri hryllingsmynd en fyrir fjölskyldu, sem býr í Illinois í Bandaríkjunum, er þetta ekki bara lýsing á lélegri hryllingsmynd heldur lýsing á raunveruleikanum.

Síðustu sex ár hefur fjölskyldan heyrt raddir og tónlist berast úr veggjum heimilisins. ABC 7 Chicago skýrir frá þessu.

„Við heyrum þetta greinilega og þetta heldur fyrir okkur vöku á nóttunni.“

Sagði fjölskyldufaðirinn Richard Smith í samtali við miðilinn.

Hljóðin berast úr vegg í einu svefnherbergi hússins. Ekki er vitað hvað veldur þessu þrátt fyrir að fjölskyldan hafi margoft reynt að komast að því. Smith hefur meðal annars opnað vegginn til að kanna hvort eitthvað væri inni í honum sem gæti varpað ljósi á málið en svo var ekki.

Vandamálið er svo mikið að fjölskyldan hefur fengið lögregluna á vettvang og staðfestu lögreglumenn að raddir heyrðust úr veggnum. Þessu er líkt við að prestur sé að predika og stundum heyrist kristileg tónlist frá veggnum.

Smith grunar að raddirnar og tónlistin berist frá nálægum útvarpssendi og er kenning hans að þetta eigi rætur að rekja til kristilegu útvarpsstöðvarinnar AM 1160 en það hefur ekki fengist staðfest. Stöðin sendi verkfræðing heim til fjölskyldunnar til að rannsaka málið en hann fann ekkert sem gat skýrt af hverju raddir berast úr veggnum.