Rússneska kjarnorkueldflaugin 9M730 Burevestnik hefur verið sögð „byltingarkennd“ vegna nýstárlegrar hönnunar. Sagt er að drægi eldflaugarinnar sé nær ótakmarkað en hún var eitt sex nýrra kjarnorkuvopna sem Vladimír Pútín, Rússlandsforseti, afhjúpaði í mars 2018. Þá hefur eflaust farið skjálfti um margar aðrar þjóðir og það dregur kannski ekki úr skjálftanum að vopnið virðist ekki vera mjög áreiðanlegt. Svo óáreiðanlegt er það að ekki er útilokað að við höfum staðið á brún þriðju heimsstyrjaldarinnar fyrir ekki svo löngu.

Samkvæmt upplýsingum bandarískra leyniþjónustustofnana hefur aðeins 1 af 12 tilraunum með eldflaugar af þessari tegund tekist. Svo illa hefur tekist til að rússneski herinn hefur ekki hugmynd um hvað varð um hinar 11. Þetta kemur fram í heimildamyndinni „The Race to Find Russia‘s Lost Nuke“.

Í myndinni kemur fram að í nóvember 2017 hafi Rússar skotið slíkri eldflaug á loft frá Pankovo herstöðinni á Yuzhny eyju en hún hefur verið notuð við kjarnorkutilraunir síðan á sjötta áratugnum. Eftir aðeins tveggja mínútna flug misstu Rússar hins vegar stjórn á eldflauginni sem flaug áfram stjórnlaust þar til hún endaði í Barentshafi undan norðurströnd Rússlands.

Þrátt fyrir mikla leit tókst Rússum ekki að finna eldflaugina. Líklegt er talið að hún liggi á botni Barentshafs.

Ef flaugin hefði hinsvegar lent á landi og sprungið hefði varla þurft að spyrja að leikslokum því hætt er við að „andstæðingar“ Rússa hefðu þá talið að um kjarnorkuárás væri að ræða og hefðu svarað fyrir sig að bragði með kjarnorkuvopnum.