Þrjátíu og fjögurra ára karlmaður gæti átt ákæru fyrir manndráp af gáleysi yfir höfði sér eftir að hann varð föður sínum að bana í þjóðgarði á Ítalíu í gær.
Mennirnir voru á veiðum í Salerno þegar sonurinn sá eitthvað sem hann taldi vera villisvín. Hann var með skotvopn meðferðis og tók í gikkinn, en ekki vildi betur til en svo að skotið fór í föður hans.
Sonurinn hafði strax samband við neyðarlínuna en læknum tókst ekki að bjarga lífi föðurins, Martino Gaudioso. Skotið hæfði hann í kviðinn en Martino var 55 ára.
Lögregla lagði hald á skotvopn feðganna en í ljós kom að þeir höfðu ekki leyfi til að veiða á svæðinu. Lögregla er með málið til rannsóknar og skoðar nú hvort sonurinn verði kærður vegna málsins.