Þýski ökuþórinn Michael Schumacher, sem slasaðist alvarlega í skíðaslysi í desember 2013, er staddur í París þessa dagana þar sem hann gengst undir stofnfrumumeðferð. Schumacher hlaut alvarlega höfuðáverka í slysinu og lá í dái í nokkra mánuði. Lítið hefur spurst út um heilsu hans eftir slysið.
Í frétt Le Parisien, sem Telegraph vitnar til, kemur fram að Schumacher gangist nú undir meðferðina á Georges-Pompidou sjúkrahúsinu í París. Þar starfar einn fremsti sérfræðingur heims, hjartaskurðlæknirinn Philippe Menasche.
Ekki liggur nákvæmlega fyrir hverju meðferðin á að skila en Telegraph segir að markmiðið sé meðal annars að minnka bólgur í líkama Schumachers. Í frétt Le Parisien kemur fram að Schumacher verði útskrifaður af spítalanum á morgun.
Schumacher er einn sigursælasti ökuþór sögunnar og af mörgum talinn einn allra fremsti íþróttamaður síðustu 30 ára.