VG skýrir frá þessu. Haft er eftir talsmanni lögreglunnar að enn séu vísbendingar í málinu sem hægt er að vinna eftir og fylgja. Tommy Brøske, yfirlögregluþjónn, sem stýrir rannsókninni sagði að lögreglan stefni á að upplýsa málið. Rannsóknin sé í fullum gangi og langt frá því að vera lokið. Mörgu sé enn ólokið í rannsókninni og lögreglan haldi fast í það markmið sitt og hugsanir um að hægt sé að upplýsa málið. Það veldur lögreglunni þó miklum áhyggjum að nú hefur ekki heyrst frá mannræningjunum um langa hríð og þeir hafa aldrei fært neinar sönnur á að Anne-Elisabeth sé á lífi.
„Við teljum enn að við getum leyst málið.“
Sagði Brøske og bætti við að niðurstöður liggi nú fyrir í mörgum tæknilegum rannsóknum sem voru gerðar á heimili Hagen-hjónanna eftir ránið en hann vildi ekki skýra nánar frá þeim að sinni.
Enn er verið að rannsaka bréfin sem voru skilin eftir á heimilinu með kröfu um lausnargjald.
Málið hefur vakið mikla athygli og fengið mikla umfjöllun í fjölmiðlum víða um heim. Lögreglan hefur lagt mikla vinnu í rannsókn þess en hefur ekki miðað mikið áfram og virðist ekki vera nær því að upplýsa málið nú en í upphafi.
Mannræningjarnir kröfðust lausnargjalds upp á 9 milljónir evra fyrir að láta Anne-Elisabeth lausa og átti að greiða það í rafmynt. Nú hefur ekki heyrst frá mannræningjunum í rúmlega tvo mánuði og hefur lögreglan áhyggjur af að Anne-Elisabeth sé ekki lengur á lífi.
