Ef farið er nægilega langt aftur í tímann kemur í ljós að forfeður okkar bjuggu á votlendi sem huldi það sem í dag eru Makgadikgadi-saltslétturnar í norðausturhluta Botsvana. Þar á mannkynið uppruna sinn samkvæmt niðurstöðum nýrrar erfðafræðirannsóknar.

Videnskab.dk skýrir frá þessu. Mannkynið tók sín fyrstu skref á þessu svæði fyrir 200.000 til 130.000 árum. Það var ekki fyrr en eftir þetta tímabil sem það fór að færa sig um set, norðaustur og suðvestur.

Í nýju rannsókninni rannsökuðu vísindamenn mörg þúsund DNA í hvatberum sem er að finna í ýmsum gagnabönkum í Afríku. Hvatberar eru litlar orkustöðvar í frumum líkamans og erfast þeir frá móður til barns og hafa gert allt frá árdögum mannkynsins.

Með því að rannsaka hvatberana og skoða muninn á DNA hinna ýmsu þjóðernishópa gátu vísindamennirnir sett erfðafræðilegt ættartré saman. Með þessari aðferð gátu þeir afmarkað fyrrnefnt votlendissvæði sem upprunasvæði mannkynsins. Þar býr Khoesan-ættflokkurinn í dag.

Það lá strax ljóst fyrir að mannkynið gat ekki hafa orðið til og lifað af á því svæðinu eins og aðstæður eru þar í dag. Fengu vísindamennirnir því steingervingafræðinga til liðs við sig til að rannsaka loftslagið á þessu svæði fyrir um 200.000 árum. Þær rannsóknir sýndu að fyrir 200.000 árum voru Makgadikgadi-saltslétturnar hluti af risastóru votlendissvæði sem varð til þegar vatn, sem náði allt frá Namibíu til Simbave, byrjaði að þorna upp.