Vísindamenn í Kína hafa verið harðlega gagnrýndir fyrir að nota lifandi svín í árekstrarprófum. Að minnsta kosti sjö grísir drápust í umræddum prófunum og átta hlutu alvarleg meiðsl; innvortis blæðingar eða beinbrot.
Breska blaðið Independent skýrir frá þessu.
Í frétt blaðsins kemur fram að sérfræðingar hafi valið þessa leið við hönnun öryggisbelta fyrir börn. Grísir hafi orðið fyrir valinu vegna þess að líffærafræðileg samsetning þeirra væri svipuð og hjá börnum við sex ára aldur. Var dýrunum komið fyrir á sleða sem var síðan ekið á vegg á tæplega 50 kílómetra hraða.
Grísirnir fengu ekkert að borða í sólarhring fyrir prófin og þá fengu þeir ekki vatn sex tímum áður en prófin fóru fram. Þeim var gefið róandi lyf áður en tilraunin fór fram.
Forsvarsmaður Understanding Animal Research, samtaka sem alla jafna styðja rannsóknir þar sem dýr eru notuð, sagði ekkert réttlæta umrædda tilraun. Ljóst væri að tilraunir sem þessar yrðu aldrei leyfðar í Bretlandi. Þá hafa dýraverndunarsamtökin Peta gagnrýnt tilraunirnar harðlega og sagt þær villimannslegar.
Í frétt Independent er greint frá því að sérfræðingar séu í auknum mæli farnir að nota tölvulíkön í árekstrarprófum.
