Lögreglumenn skutu mann skammt frá London Bridge í Lundúnum í dag, en maðurinn hafði ráðist að vegfarendum með hníf. Mikil ringulreið skapaðist þegar maðurinn réðst að vegfarendum og lýsa vitni því hvernig fólk hljóp undan manninum. Ekki liggur fyrir hvað manninum gekk til eða hvort hann hafi tengsl við hryðjuverkasamtök. Breska lögreglan rannsakar þó árásina sem hryðjuverk.
Vitni hafa tjáð sig við BBC og sagt frá því sem þau sáu. Amanda Hunter, sem var í strætó á brúnni þegar árásirnar áttu sér stað, er ein þeirra sem segir frá. „Allt í einu stoppaði strætisvagninn og ég heyri einhver læti. Ég leit út um gluggann og sá þessa þrjá lögreglumenn gera atlögu að manni,“ segir Amanda. „Það virtist vera sem hann hefði eitthvað í höndunum, ég er ekki hundrað prósetnt viss. Síðan skaut einn lögreglumaðurinn hann.“
Strætóbílstjórinn Mustafa Salih, var á leiðinni í átt að Lundúnabrú þegar hann sá lögreglubílana og vegalokanirnar. Hann segir lögreglumann hafa komið upp að sér og sagt við sig: „Slökktu á vélinni og hlauptu í burtu.“ Mustafa segirst síðan hafa litið upp og séð fjölda fólks flýta sér af brúnni. „Ein konan var grátandi. Ég hljóp í burtu. Þetta var allt mjög hræðilegt þar sem við vissum ekkert hvað var í gangi.“
