Lögreglan á Ítalíu framkvæmdi húsleitir á nítján stöðum og lagði meðal annars hald á mikið magn skotvopna í aðgerð fyrr í þessari viku. Nokkrir voru handteknir í aðgerðum lögreglu.

Málið tengist fyrirhugaðri stofnun nýs nasistaflokks á Ítalíu. Liðsmenn flokksins eru sagðir ekki hafa ætlað að fara leynt með hrifningu sína á nasisma og andúð í garð útlendinga. Að því er fram kemur í frétt BBC beindust aðgerðirnar til að mynda gegn tveimur konum, sem gengu annars vegar undir nöfnunum „liðþjálfi Hitlers“ og hins vegar „Fröken Hitler“.

Eins og að framan greinir lagði lögregla hald á talsvert magn vopna, bæði skotvopna og sprengiefnis.

Farið var í aðgerðirnar á grundvelli laga sem sett voru árið 1952, en þau kveða á um bann við tilraunir þess efnis að endurvekja Fasistaflokkinn sem Benito Mussolini stofnaði. Að sögn lögreglu hefur verið fylgst náið með hópnum í tvö ár. Eru meðlimir samtakanna sagði hafa unnið að því hörðum höndum að auka tengsl og samstarf við öfgahægrimenn í öðrum Evrópuríkjum.