Sermitsiaq skýrir frá þessu. Fram kemur að í framtíðinni muni flokkurinn styðja ríkjasambandið við Danmörku. Á undanförnum árum hafði flokkurinn stutt hugmyndir um sjálfstæði frá Danmörku en þar áður vildi hann að Grænland væri áfram í ríkjasambandi við Danmörku.
Nýr formaður flokksins, Aqqalu Jerimiassen, segir að það hafi verið „ein stærstu mistök“ flokksins þegar hann hvarf frá stuðningi við ríkjasambandið á sínum tíma. Hann sagði einnig að Grænlendingar eigi að vera stoltir yfir nánum böndum landsins við Danmörku. Ekki sé raunhæft að stefna á sjálfstæði í fyrirsjáanlegri framtíð og þess utan séu Grænlendingar ekki tilbúnir til að verða sjálfstæðir. Flokkurinn hefur áratugum saman fengið einn þingmann kjörinn á danska þingið, en þar eiga Grænlendingar tvo fulltrúa, en í síðustu kosningum fékk flokkurinn engan mann kjörinn.