Lögreglan í Nýju Suður-Wales í Ástralíu hefur handtekið karlmann, John Bowie, vegna gruns um að hann hafi átt þátt í hvarfi eiginkonu sinnar árið 1982.
Bowie þessi er 69 ára og starfaði um árabil sem sjúkraflutningamaður.
Það var laugardaginn 5. júní árið 1982 sem Roxlyn Bowie sást síðast á lífi. Roxlyn var úrskurðuð látin fyrir nokkrum árum en þó að brátt séu liðin 40 ár frá hvarfinu hefur lík hennar ekki fundist. Þegar Roxlyn hvarf átti hún tvö börn, 6 og 2 ára.
John hefur þvertekið fyrir það að hafa átt þátt í hvarfi Roxlyn en ekki liggur fyrir hvaða upplýsingar lögregla hefur sem mögulega varpa ljósi á sekt hans.
Dóttir Roxlyn, Brenda Boyd, segir við fjölmiðla að tilfinningar hafi verið blendnar þegar hún heyrði af handtökunni. Hún þakkaði lögreglu fyrir að leggja ekki árar í bát við rannsókn málsins.
