Victor Vickery, þrítugur karlmaður í Flórída, hefur verið ákærður fyrir manndráp í kjölfar líkamsárásar í sumar. Málið hefur vakið talsverða athygli en Vickery er sakaður um að hafa barið gluggagægi til óbóta.

Forsaga málsins er su að í júlímánuði lá Vickery í rúminu með kærustu sinni, Samönthu Hobi, þegar þau urðu vör við hreyfingu fyrir utan svefnherbergisgluggann.

Vickery dreif sig út, hálfnakinn og berfættur, og hitti þar fyrir 57 ára mann að nafni Asaad Akar sem lá á glugganum með getnaðarliminn úti. Vickery brást ókvæða við og lét höggin dynja á Akar sem mátti síns lítils. Þegar lögregla kom á vettvang lá Akar í blóði sínu við gluggann, meðvitundarlaus, og var hann úrskurðaður látinn á sjúkrahúsi tveimur tímum síðar.

Vickery var handtekinn á fimmtudag vegna málsins þar sem hann var ákærður fyrir manndráp. Að sögn Miami Herald liggur ekki fyrir hvers vegna þrír mánuðir liðu þar til Vickery var handtekinn. Sjálfur hefur Vickery sagt að hann hafi óttast um eigið öryggi og þess vegna hafi hann ráðist á Akar.