Once Upon a Time in Hollywood, nýjast mynd Quentin Tarantino, verður ekki tekin til almennra sýninga í Kína samkvæmt ákvörðun nefndar í landinu.
Til stóð að frumsýna myndina þann 25. október næstkomandi en af því verður ekki. Engin ástæða hefur verið gefin út en Los Angeles Magazine lætur að því liggja að dóttir hasarmyndastjörnunnar Bruce Lee hafi verið ósátt með að faðir hennar hafi verið sýndur í neikvæðu ljósi í myndinni. Bruce Lee var af kínversku bergi brotinn en hann lést árið 1973, aðeins 32 ára að aldri.
Dóttir hans, Shannon Lee, er sögð hafa farið fram á það að myndin yrði klippt en Quentin Tarantino ekki fallist á það.
Once Upon a Time in Hollywood hefur þegar þénað 366 milljónir Bandaríkjadala en vonir stóðu til að hún færi yfir 400 milljóna dollara markið þegar hún yrði frumsýnd í Kína.