Yfirleitt gengur vegabréfsskoðun hratt og vel fyrir sig á flugvöllum víðast hvar um heiminn. En þegar Indverjinn Swami Sivanandas millilenti í Dubai á leið heim til Kolkata frá Lundúnum ráku flugvallarstarfsmenn upp stór augu og trúðu ekki því sem þeir sáu.
Í reitnum þar sem fæðingardagurinn er skráður stóð nefnilega 8. ágúst 1896!
Þegar Swami var spurður hvort þetta væri virkilega rétt sagði hann svo vera. En margir áttu nú samt sem áður erfitt með að trúa að hann sé virkilega 123 ára. Ef svo er þá er hann elsta manneskjan sem vitað er um til þessa. Gulfnews.com skýrir frá þessu.
Swami segir sjálfur að það sé einföld uppskrift að svona löngu lífi en þessi einfalda uppskrift getur eflaust reynst mörgum erfið.
„Agi er það mikilvægasta í lífinu,“ segir hann.
„Það er hægt að sigrast á öllu með því að beita sig hvað varðar matarvenjur, líkamsrækt og kynferðislegar langanir.“
Hvað það síðast nefnda varðar segist hann hafa fylgt því algjörlega allt sitt líf.
Það leikur svo sem enginn vafi á að Swami er gamall en hins vegar er umdeilanlegt hvort hann er 123 ára. Vandinn er hins vegar að þegar hann fæddist, hvort sem það var 1896 eða síðar, voru skráningar á nýburum ekki upp á marga fiska á Indlandi. Indversk yfirvöld urðu því að taka mark á fæðingarvottorði útgefnu af klaustri Swami þegar hann sótti um vegabréf.