Bandaríska alríkislögreglan FBI telur að Samuel Little, 79 ára, hafa að minnsta kosti 50 mannslíf á samviskunni. Ef það er rétt þá er hann afkastamesti raðmorðinginn í sögu Bandaríkjanna. Sjálfur segist hann hafa myrt 93. Hann hefur þegar hlotið dóm fyrir þrjú morð.
Little segist hafa myrt 93 frá 1970 til 2005. FBI hefur þó ekki tekist að tengja hann við nema 50 morð en talsmenn stofnunarinnar segja að ástæða sé til að telja játningar Little trúverðugar.
Lögreglan hefur opnað sérstaka vefsíðu um Little. Þar kemur fram að vitað sé að mörg fórnarlambanna, sem flest voru konur, hafi látist af of stórum eiturlyfjaskammti, í óútskýrðum slysum eða að ekki hafi tekist að staðfesta dánarorsök þeirra. Ekki hefur tekist að finna öll líkin.
Á síðunni er birt myndbandsupptaka af Little þar sem hann segir frá morðunum og birtar teikningar eftir hann af meintum fórnarlömbum hans.
Hann hlaut lífstíðarfangelsisdóm 2014 eftir að hafa verið sakfelldur fyrir þrjú morð.