Fyrir um mánuði síðan var gefin út alþjóðleg handtökuskipan á hendur Norðmanni á fimmtugsaldri sem er grunaður um að hafa kyrkt breskan fjölskylduföður í Taílandi. Alþjóðalögreglan Interpol hefur lýst eftir manninum í 188 löndum. Maðurinn á 15 ára fangelsi yfir höfði sér verði hann fundinn sekur um morðið. Nú hafa ættingjar hans og vinir hafið fjársöfnun til að aðstoða hann á flóttanum undan hinum langa armi laganna.

Norðmaðurinn lenti í átökum við Bretann aðfaranótt 21. ágúst og kyrkti hann að því að talið er. Áður hafði Norðmaðurinn verið stunginn. Hann var handtekinn en síðan sleppt lausum gegn tryggingu. Hann lagði á flótta í kjölfarið og hefur lögreglunni ekki tekist að hafa uppi á honum.

TV2 hefur eftir lögmanni hans, Sulman Hussain, að skjólstæðingi hans líði illa vegna málsins en hafi ekki í hyggju að reyna að komast hjá því að hljóta sína refsingu vegna málsins. Hussain sagði að maðurinn hafi sætt hótunum og lögreglan hafi ekki getað tryggt öryggi hans og því sé hann á flótta og verði þar til hægt verði að tryggja öryggi hans. Hann sagði að maðurinn óttist að verða drepinn enda hafi honum borist beinar líflátshótanir frá bæði breskum og taílenskum aðilum. Hann telji sig hafa beitt nauðvörn og hafi þurft að drepa Bretann til að sleppa lifandi.

Ættingjar og vinir mannsins hafa hafið fjársöfnun til að aðstoða hann á flóttanum og senda honum peninga að sögn Hussain. Norska utanríkisráðuneytið hefur ekki viljað aðstoða manninn frekar en norska sendiráðið í Taílandi að sögn Hussain.