Í byrjun mánaðarins fundust 44 lík í 119 svörtum pokum í brunni nærri bænum Guadalajara í vesturhluta Mexíkó. Íbúar í bænum kvörtuðu undan slæmri lykt til yfirvalda og var það lyktin sem leiddi lögregluna að líkunum.

BBC skýrir frá þessu. Haft er eftir talsmanni öryggismálaráðuneytis landsins að honum þyki leitt að þurfa að ræða þetta mál en samfélagið eigi rétt á að vita hvað gerðist.

Guadalajara er í Jalisco-ríki en þar heldur eitt hættulegasta glæpagengi Mexíkó, Jalisco New Generation Cartel, til.

Mexico News Daily segir að morðtíðnin í Jalisco hafi aukist um 21 prósent það sem af er þessu ári miðað við sama tíma í fyrra. Rúmlega 3.000 manns er saknað í ríkinu. Af þeim sökum vildu margir fá að vita þegar búið var að bera kennsl á líkin 44.